საქართველოს მთამსვლელთა გაერთიანებული ფედერაცია ცოცვისა და მთამსვლელობის საერთაშორისო ფედერაციის (UIAA) წევრი გახდა

„მთამსვლელებისთვის, მთებისთვის, მსოფლიოსთვის“, ეს UIAA-ს – ცოცვისა და მთამსვლელობის საერთაშორისო ფედერაციის დევიზია, რომლის წევრიც სულ ცატა ხნის წინ საქართველოც გახდა.

UIAA-ში გაწევრიანება ფედერაციისთვის და ქვეყნისთვის უდიდესი წარმატებაა, რომელიც ფედერაციასა და მის სპორტსმენებს შესაძლებლობას მისცემს ჩაერთონ როგორც თავად UIAA-ს, ისე მისი წევრების მიერ ორგანიზებულ საერთაშორისო სპორტულ თუ სხვა სახის ღონისძიებებში/შეჯიბრებებში, გაიარონ შესაბამისი სწავლებები, მიიღონ ის შეღავათები და ბენეფიტები, რაც დადგენილი იქნება UIAA წევრი ორგანიზაციების სპორტსმენთათვის, ჩაერთონ მოხალისეებად, ითანამშრომლონ UIAA-ს წევრ სხვა ორზანიზაციებთან/სპორტსმენებთან, გაიზიარონ მსოფლიოს წამყვანი სპორტული ორგანიზაციების გამოცდილება სპორტული, განათლების, უსაფრთხოების, გარემოსდაცვითი, სტრუქტურული, მმართველობითი, მარკეტინგული და სპონსორებთან ურთიერთობების მიმართულებით, გააცნონ საქართველო, საქართველოს მთა და ქართული ალპინიზმი მსოფლიოს, საქართველოში გამართონ საერთაშორისო მაშტაბის ღონისძიებები და ხელი შეუწყონ საქართველოს მთებში UIAA-ს წევრი ქვეყნების სპორტსმენთა შემოდინებას.

საქართველოს მთამსვლელთა გაერთიანებული ფედერაცია UIAA-ში მიღებულ იქნა აქტიურ სრულფასოვან წევრად, რაც იმას ნიშნავს, რომ UIAA-ს მომდევნო გენერალურ ანსამბლეებზე მას ექნება ხმის უფლება გადასაწყვეტ საკითხებთან დაკავშირებით.

გვინდა გაგიზიაროთ მცირე ინფორმაცია იმის შესახებ, თუ ვინ არის UIAA და რა შესაძლებლობების იძლევა მასში გაწევრიანება.

UIAA – ცოცვისა და მთამსვლელობის საერთაშორისო ფედერაცია არის ცოცვისა და მთამსვლელობის განმავითარებელი წამყვანი გლობალური ქსელი, რომლის მიზანია სამთო სპორტის განვითარების ხელშეწყობა და პოპულარიზაცია, უსაფრთხოების სტანდარტების შემუშავება და მთის გარემოსა და კულტურის დაცვა. ის ასევე მხარს უჭერს მთის რეგიონებში მდგრადი ტურიზმის განვითარებას და გარემოს დაცვით ინიციატივებს.

UIAA დაარსდა 1932 წელს. 2023 წლის მონაცემებით, იგი გლობალურად არის წარმოდგენილი ექვს კონტინენტზე, 72 ქვეყნის 94 წევრი ასოციაციისა და ფედერაციის მიერ, რომელთაც უკვე ჩვენი ფედერაციაც შეუერთდა.

UIAA დაინტერესებულია და მოიცავს ცოცვასა და მთამსვლელობასთან დაკავშირებულ ისეთ სპორტულ დისციპლინებსა და აქტივობებს, როგორიცაა: მთამსვლელობა (ალპინიზმი), ცოცვა, სპორტული ცოცვა, ყინულზე ცოცვა, მშრალი ხელსაწყოებით ცოცვა (dry tooling), სამთო გამყოლობა/გიდობა, სათხილამურო მთამსვლელობა, სამთო მოხალისეობა, სამთო მაშველობა…

UIAA-ს საქმიანობაში ჩართულია და მხარს უჭერს დაახლოებით 250 მოხალისე, რომლებიც ემსახურებიან მთამსვლელობისა და ცოცვის ზრდას და დაცვას მთელ მსოფლიოში სხვა და სხვა აქტივობების განხორციელებით, იქნება ეს უსაფრთხოების სტანდარტების შემუშავება და გავრცელება, ტრეინინგების გამართვა, რესურსების გამზადება, გაწვრთნა, ეკოლოგიურ პროექტებსა და კამპანიებში მონაწილეობა, მედიისა და საზოგადოების ინფორმირება, ღონისძიებების ორგანიზება და თუ სხვა აქტივობების შესრულება.

UIAA თავის მისიას ძირითადად ასრულებს კომისიების მეშვეობით, რომლებიც დაკომპლექტებულნი არიან თავიანთი სფეროს ექსპერტებით.

UIAA-ში მოქმედებს შემდეგი კომისიები:

• ანტიდოპინგური კომისია
• იურიდიულ საქმეთა კომისია
• სამედიცინო კომისია
• მთამსვლელობის კომისია
• მთის დაცვის კომისია
• უსაფრთხოების კომისია
• სასწავლო კომისია
• ახალგაზრდობის კომისია

კომისიები შესაბამის სფეროში გასცემენ რეკომენდაციებს, ადგენენ პოლიტიკას და გამოდიან/მხარს უჭერენ მთამსვლელთა საერთაშორისო საზოგადოების სახელით.

UIAA აქტიურად არის ჩართული და მნიშვნელოვან როლს ასრულებს მსოფლიო გარემოსდაცვით საკითხებში. იგი არის გაეროს 2020 წლის იანვრის კლიმატის ცვლილების ჩარჩო კონვენციის (UNFCCC) –  „სპორტი კლიმატის მოქმედებისთვის ინიციატივისა“ და გლაზგოს 2021 წლის ნოემბრის “ტურიზმში კლიმატის მოქმედების შესახებ” დეკლარაციის ხელმომწერი. UIAA მიზნად ისახავს წაახალისოს მთით დაინტერესებული ყველა მხარე ჩაერთონ კონკრეტულ ზომებში კლიმატის ცვლილების ეფექტის შესამცირებლად და მასთან ადაპტაციისთვის. კლიმატის ცვლილების წინააღმდეგ ბრძოლის ვალდებულებების შესასრულებლად 2021 წლის ბოლოდან UIAA-ში შექმნილია კლიმატის ცვლილების სამუშაო ჯგუფი, რომლის როლი კლიმატის მოქმედებასთან დაკავშირებული პროცესების ხელმძღვანელობა და წევრებისთვის საუკეთესო პრაქტიკის გაზიარება-გაცვლის პლატფორმის შეთავაზებაა.

UIAA 1995 წლიდან აღიარებულია საერთაშორისო ოლიმპიური კომიტეტის მიერ, როგორც საერთაშორისო ფედერაცია, რომელიც წარმოადგენს მთამსვლელობასა და ცოცვას. ფედერაცია მოწოდებულია დაიცვას ოლიმპიური ღირებულებები და შექმნას უკეთესი სამყარო სპორტის საშუალებით.

საქართველოს მთამსვლელთა გაერთიანებული ფედერაციის მსოფლიო მთამსვლელობის დიდ ოჯახთან გაერთიანება, ახალი ნაბიჯია ქართული ალპინიზმის განვითარების გზაზე, რაც მეტ საშუალებას მისცემს მას საერთაშორისო ასპარეზზე წარმოდგენისთვის და ღირსეული ადგილის დამკვიდრებისთვის.

მთამსვლელებისთვის, მთებისთვის, მსოფლიოსთვის.

ფოტოები