მთამსვლელთა სკოლის სპორტული ჯგუფის ვარჯიშები და ექსპედიცია

უფრო ვრცლად ჭაუხის მასივში განხორციელებულ მთამსვლელთა სკოლის სპორტული ჯგუფის ვარჯიშებსა და ექსპედიციებზე:

ჭაუხის სპორტულ ბანაკს, რომელიც 11 დღის განმავლობაში (24 ივნისი- 04 ივლისი, 2025) მიმდინარეობდა, ხელმძღვანელობდა გიორგი ტეფნაძე

ბანაკის ინსტრუქტორები იყვნენ: ბაქარ გელაშვილი, თემურ ქურდიანი, ვახო ბლაგიძე.

წლევანდელ სპორტულ ბანაკში მონაწილეობა 11-მა მთამსვლელმა მიიღო: თორნიკე ტეფნაძე, ნესი მაჭავარიანი, ზაალ ებანოიძე, ეკატერინე რატიანი, ლერი პაქსაძე, სოფიო კუსიანი, ტატა მერაბიშვილი, თეონა ძულიაშვილი, ნიკოლოზ ხუბულაშვილი, შალვა რაქვიაშვილი, პავლე თაბაგარი.

ბანაკის გუნდის წევრები, ასევე იყვნენ გიორგი ჯაფარიძე და მისი დამხმარე გუნდი, რომლებიც ზრუნავდნენ ბანაკის საკვებზე.

ჭაუხის სპორტული სკოლის მიზანი იყო იმ მთამსვლელებისთვის ხელის შეწყობა, რომლებსაც უკვე აქვთ მთაში სიარულის გარკვეული გამოცდილება; მათი გამოცდილების გამდიდრება და უნარ-ჩვევების შეძენა, რათა მომავალში დამოუკიდებლად შეძლონ სხვადასხვა სირთულის მარშრუტებზე სიარული. სკოლა მოიაზრებდა როგორც თეორიულ, ასევე პრაქტიკულ ნაწილს:

– აღჭურვილობის გაცნობა, კლდოვან რელიეფზე დაცვის უზრუნველყოფა,

-კლდეზე ცოცვის/უსაფრთხო გადაადგილების, “ტრადიციული ცოცვის” და თოვლ-ყინულოვან რელიეფზე გადაადგილების/ დაცვის უზრუნველყოფის ვარჯიშები

– სხვადასხვა სირთულის (2,3,4 – UIAA.) მარშრუტებზე გასვლები.

ბანაკის ფარგლებში, 11 დღეში, გუნდმა განახორციელა 19 ასვლა სხვადასხვა სირთულის მარშრუტებზე, მათ შორის, რამოდენიმე ტრავერსი.

ბანაკის ფარგლებში მიღებულ გამოცდილებასა და პროფესიულ ზრდაზე რამდენიმე მონაწილეთა შეფასებას გთავაზობთ:

ნესი მაჭავარიანი: – „ჭაუხის სპორტული ბანაკი იყო ორიენტირებული მთაში უსაფრთხოდ გადაადგილებაზე; სწავლება მიმდინარეობდა მაღალი დონის სტანდარტებითდა აქტიური ვარჯიშით. ინსტრუქტორების მიერ ხდებოდა თეორიული ცოდნის გაზიარება და პრაქტიკაში გადატანა. სპორტული შეკრებების შედეგად მიღებული ცოდნით შემიძლია ვიარო მთაში დამოუკიდებლად და უსაფრთხოდ სხვადასხვა კატეგორიის მარშუტებზე.“

ნიკოლოზ ხუბულაშვილი: – “ჭაუხის შეკრება ჩემთვის მხოლოდ კიდევ ერთი ვარჯიში არ ყოფილა ეს იყო საგრძნობი წინსვლა ტექნიკურად. დეტალებზე ფოკუსი, და სწორად შერჩეული დატვირთვა, ზუსტად ის მივიღე, რაც მინდოდა. კიდევ ერთხელ გავიაზრე რომ, მთა არ გპატიობს სიზარმაცეს. ინსტრუქტორების მხარდაჭერა და პროფესიონალიზმი განსაკუთრებით გამოსარჩევია, მათი დაკვირვებული თვალი და სწორი შენიშვნები მეხმარებოდა, რეალურად გამეგო და გამესწორებინა სუსტი მხარეები. ასეთი გარემო რეალურად გძრავს წინ, როცა მიზანი მხოლოდ ცოცვა კი არა, პროგრესია როგორც სპორტსმენის, ისე პიროვნულად. “

ტატა მერაბიშვილი: – ,,აღსანიშნავია სპორტული ბანაკის მონაწილეების და ინსტრუქტორების ღია დამოკიდებულება ცოდნის მიღება-გაცემის პროცესის დროს. კარგ სავარჯიშო-სპორტულ ასვლებთან ერთად, ერთმანეთისთვის გამოცდილებების გაზიარებამ, მომავალ სპორტსმენებს ბევრი ახალი თეორიულ-პრაქტიკული ცოდნა შესძინა”.

ეკატერინე რატიანი: – “ბანაკში ყველაფერი თავის ადგილზე იყო. ინსტრუქტორები იმაზე უკეთ გრძნობდნენ ჩემს შესაძლებლობებსა და საჭიროებებს, ვიდრე მე. მისმენდნენ, მაკვირდებოდნენ, შენიშვნებს მაძლევდნენ, ვმსჯელობდით… მოახერხეს, რომ სრული გააზრებით მევლო ყველა მარშუტი. მეგრძნო დამოუკიდებლობა, თავისუფლება და ჩემი თითოეული ნაბიჯის პასუხისმგებლობა. ამასთან, გვაჩვენეს როგორ შევხვედროდით მთისთვის შესაფერის, ზოგჯერ არც ისე სასიამოვნო გამოცდილებებს (გაკვეთილებს) – მშვიდად, ზუსტად და სწორად. ნათელია, რამდენი შრომა და ყურადღება იყო ჩადებული თითოეული მონაწილის ინდივიდუალურ განვითარებაში, ყველაფრის დაგეგმვაში, თუმცა 10 დღე მარშუტზე და საბაზოში ერთად ყოფნის შედეგად, იმაზე ბევრად მეტი ცოდნა (ემოცია) მივიღე, ვიდრე თავად ჰგონიათ რომ მომცეს. გულწრფელი მადლობა ცალ-ცალკე და ყველას ერთად, ვინც ამ ღირებულ გარემოს საფუძველი ჩაუყარა. ყოჩაღ, გამოგივიდათ! “

აღსანიშნავია, რომ ბანაკის დასრულების შემდეგ, მონაწილეთა ნაწილმა პრაქტიკაში უკვე გამოიყენა მიღებული გამოცდილება; მათ შორის არის ნესი მაჭავარიანიც, რომელმაც ორ მეწყვილესთან ერთად წარმატებით გაიარა უშბის ჩრდილოეთ მწვერვალის კლასიკური მარშრუტი; ასევე, სოფო კუსიანმა და ტატა მერაბიშვილმა წყვილში, დამოუკიდებლად იარეს მწვ. ორწვერის სამიანი კატეგორიის მარშრუტი.

ფოტოები – ნ.მაჭავარიანი, ტ.მერაბიშვილი, ა.ჯაფარიძე, რ.ბადრიაშვილი